36360 NIGRÁN
| Descricion |
O templo foi construído nos anos 1784 e 1785 por Xoán Orxe, pola cantidade de 18.950 reais. O ano seguinte, 1786, foi erixida como parroquia independente de Camos. Non tivo párroco ata 1811. Sufriu unha reforma importante no ano 1893, na que se fixo a bóveda actual da nave e a espadana. É unha soa nave de planta e ábsida rectangulares, ás que se lle adosou no lado sur unha sancristía. A fachada occidental enmárcase por dúas pilastras rematadas en pináculos, ao igual que a fachada leste. A porta adórnase cunha moldura acobadada nos ángulos. Na doela central do lintel, hai unha flor de lis dobre que serve de arranque para a peaña da base de fornela que acolle a imaxe pétrea do patrón. No lintel, partida pola flor de lis, está a inscrición do remate da obra: “HIZOSE EN — 1785” A fornela, de arco de medio punto, presenta unha moldura de cinta. Por riba dela está a ventá cadrada recercada. Remata nunha cornixa voada que fai de base á espadana de dous corpos. No primeiro, dous ocos en arco de medio punto. E no segundo, entre pináculos, outro arco de medio punto coroado por frontón semicircular que serve de base á cruz de remate. No lado norte ten catro contrafortes, mentres que no lado sur soamente tres, porque o outro correspondería no muro da sancristía. A bóveda da nave é de canón en pedra de sillería, con tres arcos faixóns que apoian en pilastras. O arco triunfal, máis baixo, é de medio punto, e a bóveda da ábsida ten unha sinxela cruzaría con clave central, ornamentada cun motivo vexetal, e grosos nervos. Como adorno interior ten unha cornixa perimetral na nave. A sancristía tamén ten bóveda de canón. |
|---|---|
| Campás | 2 campás. |
| Autor | |
