Inventario de campás
Igrexa Santa María de Nogueira do Miño - CHANTADA (GALICIA)
Referencia 9271
Lugar da Eirexe, s/n.
27515 CHANTADA
Data de construción Século XII - XVIII
Descricion Igrexa románica, da segunda metade do século XII, con reformas no XVIII na torre e na fachada. A nave é rectangular, con ábsida cadrada, e cuberta de tella a dúas augas. A ábsida ten un arco triunfal de medio punto, de sección rectangular, columnas apegadas e capiteis con decoración variada.
No testeiro conserva unha ventá de medio punto con columnas e capiteis con decoración vexetal. No lateral sur ten unha porta con arco de medio punto e arquivoltas con roseta, follas e bólas, e un tímpano con cruz de brazos iguais inscrita nun círculo. Nos laterais ten canzorros de diferentes decoracións. O frontispicio é de tradición barroca, malia que se conserva un rosetón románico de calado en cruz e rosetas. Ten tres corpos verticais separados por pilastras que rematan en cornixa e frontón de arco rebaixado e pináculos. A torre é cadrada e formada por tres corpos.
O seu interior atesoura fermosas pinturas murais de estilo manierista realizadas polo Mestre de Nogueira no século XVI. Estas cobren a cabeceira e a nave por completo. Representan escenas da Resurrección de Cristo, o Xuízo Final, a Asunción e a Anunciación, entre outras.
Campás 2 campás.