32112 PADERNE DE ALLARIZ
| Data de construción | Século XVIII. |
|---|---|
| Descricion |
A igrexa parroquial de San Salvador de Solbeira de Belmonte, presenta planta rectangular. Foi construída en limpo perpiaño, perfectamente labrado e escuadrado. A fachada é moi sinxela. A porta principal aparece decorada con pilastras de corte clasicista de fuste refundido que soportan ilusoriamente un alintelado formado por un arquitrabe e un friso liso. Sobre ambos disponse un orixinal motivo ornamental en forma de frontón semicircular curvo que presenta un orixinal quebramento xeométrico no seu segmento mais elevado. Xusto sobre o lintel da porta topamos cunha cuncha de bivalvo aberta, motivo ornamental ao que suceden en altura e en progresión ascendente unha fornela, unha xanela rectangular, e xa no seo cumial, unha espadana de dous corpos. Os extremos deste corpo central aparecen definidos por xigantescas pilastras adosadas que rematan nuns orixinais pináculos xeométricos en forma de floreiros. O fermoso e proporcionado corpo de campás confírelle á fachada un notable empuxe vertical que non fai outra cousa que realzar a súa ben dimensionada estética barroca. O ciborio do templo proxéctase en altura por medio do seu peculiar tellado a catro augas, cuberta fermosamente decorada por un pináculo de bolas en cada unha das esquinas que volve aparecer na cimeira, de onde parten cada unha das augas. O interior, en liñas xerais máis interesante que o exterior, conserva aínda cuberta en madeira e chan estrado de granito. A bóveda da ábsida é de canón corrido con arcos de medio punto. O templo conta tamén con unha tribuna traballada en madeira que aparece sustentada por un par de columnas en granito. O templo foi levantado no ano 1789, tal como proba o epígrafe que mostra a súa fachada, posiblemente onde antes estaba a capela de Santa Bárbara, que se reutilizou para facer a sancristía, e que fora cedida polos Condes de Belmonte ao pobo. |
| Campás | 2 campás. |
| Autor | |
