15151 DUMBRÍA
| Descricion |
A Igrexa de Olveira, lugar vinculado á peregrinación xacobea a Fisterra e Muxía, presenta unha planta de cruz latina cunha capela maior rectangular, aínda que un pouco estreita. Posúe unha sancristía apegada ó muro norte do presbiterio. Unha bóveda de canón cobre a capela maior. Esta capela queda unida ó resto da edificación mediante un arco triunfal sobre semicolumnas apegadas. Para iluminar o interior abriuse un óculo sobre o arco triunfal. A nave, estreita e alongada, cóbrese con bóveda de canón rebaixada de cemento e reforzada por tres arcos faixóns sobre pilastras dóricas que dividen a nave en catro tramos. No cruceiro levántase dúas capelas iguais; a da dereita dedicada ó Santo Cristo e a da esquerda á Virxe do Carme. A diferencia da nave central, estas capelas cóbrense con bóvedas de cantería granítica e ábrense á nave central mediante un arco sinxelo. Un coro alto de cemento sitúase ós pés da igrexa, como é habitual nos templos deste concello. Ó exterior obsérvase unha graduación dos volumes, xa que a nave central é máis elevada cás naves laterais. Cóbrese cun tellado a dúas augas ó igual cá ábsida. A fachada é de forma pentagonal de perfectos perpiaños de granito. Un eixo vertical organiza a distribución da fachada; de abaixo arriba aparecen a porta semicircular sen ornamentación, un van coa imaxe de San Martiño, unha fiestra rectangular, un corpo xeométrico decorado con placas e unha torre de dous corpos coroada por unha cupuliña. O retablo barroco da capela maior fórmano dous corpos divididos en tres bandas. Destacan pola súa talla as columnas salomónicas da banda central, máis alta e ancha cás laterais. |
|---|---|
| Campás | 2 campás. |
| Autor | |
